السلام عليكو

الناس فى كل مكان فى العالم بتحيي بعض بطريقة مميزة تخليك فى بعض الأحيان ممكن تعرف جنسية الشخص من تحيته ..

بعضها غريب شويه علينا و بعضها ظريف و خفيف فمثلاً تجد الصيني أو اليابانى بينحنى بصدره و رأسه للأمام قليلاً تعبيراً عن التحية و الترحيب و إذا كررها أكتر من مرة معناها أنه بيرحب أكتر أو أن الشخص دة واحشه ..

الهندى برضه بيحيي بطريقة لطيفة جدا فهو بيضم أيديه المفتوحة الى صدرة فى صورة كأنها إحتضان بس من بعيد لبعيد ، و بالطريقة دى ممكن يحيي عشرين واحد مرة واحدة يعنى مش لازم يدخل علي واحد واحد بالبوس و الأحضان ..

دول كتيرة تانية فى العالم بتكتفى بالسلام عن طريق المصافحة باليد و اذا كان السلام حار فإن المصافحة تكون أطول مع تحريك اليد فوق و تحت تعبيرا عن حرارة المصافحة ، ممكن يصاحب دة ضمه بسيطة سريعة يتلامس فيها الصدور تعبيراً أكتر عن حرارة اللقاء ..

عندنا فى بلدنا الموضوع بقى مختلف ، خصوصاً بين الرجال ..

ولأن السلام بالحضن و البوس متعارف من زمان بين البنات و السيدات فهو بقى عادى خصوصاً أن البنات بتكتفى بملامسة الخدود لزوم المحافظة على الميك أب و أحمر الخدود و الشفايف..

و بتبقى فرصة برضة كل واحدة تبص الناحية التانية فتطلع الإحساس الداخلى بطريقتها بعيد عن وش التانية و ترجع بسرعة ترسم الإبتسامة لما الوشوش تتلاقى ، على كل الأحوال و بغض النظر عن النفسيات ، فهو بروتوكول متبع بين البنات أنا شخصياً بحترمة ..

اللى إنتشر بقرف بقى هو بوس الرجالة ..

خصوصا النوعية المؤمنة بأن الشفايف لازم تطبع على خَدَّك ، يعنى تلاقى الواحد داخل يسلم عليك عادي و بعدين تلاقية غير زاوية راْسه ٩٠ درجة علشان بقة يبقى عمودى على خدودك فتنزل البوسة اللزجة على خَدَّك فى أقرف إحساس مقزز ممكن تحسة و يخليك عايز تغسل وشك بالديتول أو ميه النار حتى ..

و مما يزيد الطين بله كما يقال أن الإنسان اللزج دة بيكون عادة عرقان أو واكل طبيخ و مش غاسل بقة - زى الواد اللى كان بيبوس عادل إمام فى مسرحية شاهد ما شافش حاجة .. و حتى لو كان إنسان نضيف أكيد غصب عنه بيبقى عرقان أو عنده برد مثلاً ، ليه البوس بقى !! ليه اللزوجة !! لية تقرفنى منك !!!! ..

غير القرف و العرق متنساش الجراثيم و الميكروبات و الأمراض الجلدية اللى ممكن تنتقل عن طريق التلامس الزيادة الغير مبرر دة .. ياريت كل واحد يبدأ بنفسه و ياسيدى لو لازم بوس أبقى بوس مراتك لما تروح بس بعد ما تغسل وشك ...

أكيد طبعاً مفيش داعى ندى أمثله عن طرق التحية الغريبة التانية فى بلاد أخرى أحسن بعدين تعجب حد عندنا و تبقى مصيبة ..

تخيل مثلاً فى أستراليا لما كان يحب واحد من السكان الأصليين يحيي صديقه ، كان يطلعله لسانه علشان يحيه ! و كلما كان الصديق عزيزا كلما حاول يطّلع لسانه أكتر !!!

و فى بلاد الأسكيمو مثلا بيحكوا أنفهم في بعض تعبيرا عن التحية و كل ما كانت التحية أحر كان الحك أكتر ..!!

طبعاً الموضوع عندنا أصلا مش ناقص حك..

و بطل حك يا عم الحج..

معطلكوش ..

محمود عكوش..

محمود عكوش ..