بلاش على قد نيتنا

من كام يوم ..

كنت سايق عربيتي في الزحمة .. و من عاداتي و انا سايق زهقان من الحر و الزحمة أنى أدندن أي أغنية عربي تيجي علي بالي .. أفتكرت أغنية ياسمين الخيام اللي كانت دايماً تشتغل بعد الماتشات و اللى بتقول فيها "مبروك مبروك مبروك .. مبروك عليكم و علينا .. مبروك مبروك مبروك .. مبروك يا ناسنا و أهلينا .. يا رب كتر أفراحنا و على قد نيتنا أدينا" .. قعدت أدندن الأغنية و بعدين ركزت شوية أنا بقول أيه .. " و علي قد نيتنا أدينا !! " .. يا نهار أسود !! علي قد نيتنا أدينا !! إزاى ! و أكتشفت حقيقة .. أن ربنا فعلاً بيدينا علي قد نيتنا .. و هو نفس السبب اللي مخلينا ورا و همجيين و عالم تالت و حنفضل كدة علي طول .. و السبب واضح .. و صريح .. ربنا بيدينا علي قد نيتنا .. و نية أغلبنا نية قذرة .. نية سودة و منيله بستين نيله .. لا بنحب بعض .. و لا بنحب الخير لبعض .. و بنتخانق لأتفه الأسباب .. مستعدين نقطع بعض علي أي سبب هايف .. و واقفين لبعض علي الواحدة .. نيتنا مش صافية و لا سليمة .. و لو فضلت نيتنا كدة .. و فضلت ياسمين الخيام في نفس الوقت تغني الأغنية دي .. تأكدوا أننا حنفضل ناخد علي قد نيتنا على طول .. حتى تقوم الساعة .. أو أن يتم مسح الأغنية من أرشيف الإذاعة المصرية و من ذاكرة المصريين و هو ما لن يحدث طبعاً ..

يارب أدينا علشان إحنا غلابة .. علشان الناس الطيبة .. علشان أنت رحيم بعبادك .. علشان أي شئ ..

بس بلاش علي قد نيتنا يا رب ..

معطلكوش .. محمود عكوش ..

- مع كامل إحترامي للأغنية و المطربة العظيمة -