النجم وقع .. هاتوا السكين ..

زلاتان إبراهيموفتش نجم كبير .. مانشستر يونايتيد الفريق الأنجليزي العريق سعى لضمه و أعتبره من أنجح الصفقات في تاريخ النادي ..

إبرا عمل موسم رائع مع مانشستر اللي قرر تمديد عقد إبرا لعام آخر ..

الكلام دة كان لغاية ما حصل اللي محدش كان عامل حسابة ..

إبراهيموفتش إتصاب إصابة خطيرة ...

مانشستر قرر إلغاء التمديد و أعلن انتهاء رحلة إبرا مع الفريق .. من الآخر قالوله باي باي يا كابتن .. باي باي يا نجم ..

الخلاصة هنا أنك في شغلك طول ما أنت جامد قوى و بتأدي فأنت النجم .. لكن لو وقعت في يوم محدش حيلحقك .. أنت يا نجم أول واحد حتاخد بالشلوت ..

إبرا إتصاب علشان مانشستر ... إتصاب علشان كان بيموت نفسة فى الملعب ... بس للأسف الكلام دة ما يأكلش عيش في عالم البيزنس .. و الكورة بيزنس صرف .. و مانشستر أول من تخلى عن إبراهيموفتش لما اتصاب.. لما حس أنه خلاص مش حيأدى ..

علشان كدة لما تحس انك بقيت نجم في شغلك .. لما تبقي إبراهيموفتش في مكانك خللي بالك قوي علي رجلك ..

حاسب على نفسك .. متخليش الشغل يدمرك .. أشتغل و أدى شغلك حقه و بس .. بلاش يأخذ أكتر من حقه ..

أدي بيتك و عيالك و نفسك حقهم .. و دايماً أفتكر أن أول واحد حيبيعك يوم ما تقع هو شغلك .. مهما كنت بتموت نفسك علشان شغلك و مهما أخلصت فيه .. يوم ما تقع محدش تاني حينفعك غير نفسك و أهلك .. فأعطى كل ذى حق حقة ..

و متخليش شغلك هو أكبر همك .. بلاش يجي عليك يوم و حد يقول عليك ..

"العجل وقع" .. قصدي "النجم و قع .. هاتوا السكين" ..

معطلكوش .. محمود عكوش ..