يا وابور يا مولع

القطار السريع الذى كان حلم البشر ذات يوم و الذى أصبح الان من أكثر وسائل المواصلات شيوعا وانضباطا فى العالم لدرجة أن الناس كانوا يضبطون ساعاتهم علي ساعة وصول القطار ...

الكلام دة طبعا في أي دولة في العالم الا عندنا الشر بره و بعيد ..

عندنا بقي القطار لايزال من أكثر الأشياء إثارة للجدل فى بلدنا المحروسة .. بلد العجايب ..

فلا مواعيده مضبوطة و لا نيله ..

و مهما يغلوا أسعار التذاكر معرفش ليه لسه العربيات معفنة زى ما هى ..

و لسة التكييف إما لا يعمل و إما بارد لدرجة إنك ممكن تربى طائر البطريق معاك علي الكرسي اللي جنبك فى العربية .. بس أعمل حسابك أنه أكيد حيموت منك لما توصل لأن فرق درجة الحرارة بين برة عربية القطار و جواها كافية أنها تحوله الى بطريق بانية..

و لو مامتش ما تقلقش..

فهو حيتسرق منك في محطة مصر و العيال اللي حتسرقة حتبيعة لواحد بتاع فراخ و مش بعيد واحد يشترية و يدبحة و مراته تعمل عليه شوربة بطريق أو ملوخية بالبطاريق ..

تخيل ! ..

المهم نرجع لموضوعنا ..

وأنا راكب القطار عائدا من القاهرة الى منزلى بالأسكندرية و كعادتى بحب أحجز مقعد فردى فى الدرجة الأولى لأننى لا أحتمل كرسى الدرجة التانية الضيق ولا رائحة بول الفئران المعتق في أسفنج الكراسي من سنوات و لا أحتمل أيضا أن يجلس بجانبي أحد الا اذا أضطررت لهذا..

لأن حظى دايماً مهبب و نادراً ما جلست جنب شاب أنيق ذاهب لمقابله عمل مثلاً أو فتاه جميله مغتربة في الطريق الى الجامعة !

فاللى قاعد جنبى عادة بيكون واحد مليان و واكل سلطة ناذنجان بالثوم أو ست ما بتبطلش كلام فى الموبايل و قالعه جزمتها و ريحه شرابها مفوحه ....

وكنت و لازلت أذكر نفسى دائماً بمقولة والدى " يا واد هين قرشك و لا تهين نفسك ".. فتلاقيني علي طول أفضل الدرجة الأولي ..

المهم برضه و أنا قاعد متكتك من التكييف البارد المستوحي من القطبى الشمالى اللى حكيت عنه من شويه .. بصيت جنبى و ورايا و قدامى و قعدت أراقب الناس اللى راكبة معايا فى الدرجة الأولى ، و بعدين سألت نفسى "ياترى أيه مقياس الدرجة الأولى عندنا ؟"

و أخدتني النظرة الفلسفية للموضوع ..

يعنى هو ليه فى ناس درجة أولى و ناس درجة تانية ؟

الناس دى دفعت تذكرة أغلى و علشان كدة ركبت درجة أولى ، و فى ناس تانية دفعت أقل و ركبت درجة تانية ، بس الأتنين حيوصلوا فى نفس الميعاد أكيد...

هو صحيح الكراسى أريح شويه بس برضه فى ناس تانية متطوقة يعني نطت فى القطار من غير تذكرة علشان ملاقوش حجز بس حيدفعوا تمنها فى الطريق و برضه كله واصل فى نفس الميعاد ..

قعدت أفكر شوية و سرحت في فكرة قد أية القطار دة شبيه بالحياة ..

ناس درجة أولى و ناس درجة تانية و أكيد فيه ناس تالته و عاشرة كمان ..

الفرق بس إن فى ناس معاها تمن التذكرة بتاعة الدرجة الأولى و ناس معاهاش ..

ناس لحقت تذاكر الرحلة و ناس أتمسكت باخر أمل و نطت في القطار قبل ما يفوتها ..

ناس مرتاحة طول السكة و حتوصل مرتاحة و ناس شقيانة طول السكة و حتوصل برضه شقيانة ..

ناس حتفضل واقفة طول الرحلة مع أنها دفعت التمن و واحد حاجز كرسيين علشان يفرد رجلية براحته ...

و ناس كتيرة أتفرمت تحت العجل و محدش حس بيهم ...

فوقت علي صوت صفارة القطار ..

ياه وصلنا سيدى جابر ..

حمد الله علي السلامة ..

معطلكوش ..

محمود عكوش..